10:08 - 28.10.2026

---

28 oktyabr, Fineko/abc.az. Azərbaycanda 2026-cı ilin sentyabr ayında da xarici valyuta təklifinin tələbi üstələməsi davam etmiş, banklar müştərilərdən satdıqlarından 83,6 milyon dollar çox nağd dollar almışlar.

Cari ilin ilk doqquz ayında bankların nağd dollar alışı 1 milyard 470,9 milyon dollar, satışı isə 851,3 milyon dollar təşkil etməklə alış və satış arasındakı müsbət fərq 619,7 milyon dollara çatıb ki, bu da illik müqayisədə 3,1 dəfə çoxdur.

Mərkəzi Bankın açıqlamasına görə, tədiyə balansının cari əməliyyatlar hesabındakı profisit və maliyyə sektorunda dedollarlaşmanın davam etməsi valyuta bazarında təklifin tələbi əhəmiyyətli dərəcədə üstələməsini şərtləndirib.

Tənzimləyici qurumun baş direktoru Elrad Seydiyev bildirib ki, yüksək valyuta təklifi manatın möhkəmlənməsi istiqamətində təzyiqlər yaradır və Mərkəzi Bankın bazardan dollar alması tarazlığın qorunmasına həmçinin valyuta ehtiyatlarının artırılmasına xidmət edir.

Sentyabrın sonunda Mərkəzi Bankın rəsmi valyuta ehtiyatları 15 milyard 363,4 milyon dollara, ümumi strateji valyuta ehtiyatları isə 89 milyard 380,7 milyon dollara yüksəlib.

Valyuta bazarındakı mövcud vəziyyətin əsas makroiqtisadi amillərindən biri olan cari əməliyyatlar balansının profisiti 2026-cı ilin ilk yarısında 4,74 milyard dollar (ÜDM-in 12,4%-i) təşkil edib və AMB-nin proqnozuna əsasən, ilin sonunadək bu rəqəmin 6,1 milyard dollar olacağı gözlənilir.