17:09 - 16.10.2026

---

16 Oktyabr, Fineko/abc.az. Çin avtomobil istehsalçıları Avropa avtomobil bazarının premium seqmentində pay əldə etmək üçün qabaqcıl texnologiyalara əsaslanan "ağıllı dəbdəbə" konsepsiyasına güvənirlər. Paris Avtosalonunda Avatr (Changan), Denza (BYD) və Zeekr (Geely) kimi brendlər, sürücüyə yardım edən mürəkkəb sistemlər və sürətli enerji doldurma imkanları ilə təchiz olunmuş dəbdəbəli elektrik avtomobillərini nümayiş etdirdilər.

2026-cı ilin birinci yarısında Çində daxili avtomobil satışlarının 20% azalması fonunda, yüksək mənfəət marjasına malik Avropa bazarı genişlənmə üçün əsas hədəfə çevrilib.

"Avatr" rəhbərliyi qeyd edib ki, ABŞ istisna olmaqla, qiyməti 50 000 dollardan yuxarı olan avtomobillərin qlobal satışlarının 72%-i Avropanın payına düşür.

Bununla belə, ekspertlər vurğulayırlar ki, Çin brendləri üçün "Alman üçlüyü"nə — BMW, "Mercedes-Benz" və "Audi"yə — meydan oxumaq, yaxud avropalı istehlakçıların etibarını bir anda qazanmaq heç də asan olmayacaq.