10:41 - 28.09.2026

---

28 sentyabr, Fineko/abc.az. Azərbaycan Dövlət Neft Şirkəti (SOCAR) və "Comstock Resources" şirkəti ABŞ-dan kənarda beynəlxalq bazarlara mayeləşdirilmiş təbii qazın (LNG) tədarükü imkanlarını qiymətləndirmək üçün qüvvələrini birləşdirir.

SOCAR-dan verilən məlumata görə, tərəflər arasında imzalanmış strateji tərəfdaşlığa dair Çərçivə Sazişi əsasında əməkdaşlıq həyata keçiriləcək. Sazişə əsasən, SOCAR "Comstock"un "Haynesville" şist yataqlarındakı payına düşən təbii qazın mayeləşdirilərək ABŞ kənarındakı bazarlarda satışı imkanlarını araşdıracaq.

Əməkdaşlıq çərçivəsində tərəflərin əsas prioritetləri aşağıdakılardır:

•      Potensial alıcıların müəyyənləşdirilməsi: Beynəlxalq bazarlarda LNG-yə olan tələbatın və hədəf müştərilərin analizi.

•      Qiymət mexanizmlərinin qiymətləndirilməsi: Kommersiya baxımından optimal qiymət modellərinin qurulması.

•      Logistika və tənzimləmə: Qazın nəqli, daşınması və beynəlxalq hüquqi/tənzimləyici prosedurların araşdırılması.

Bu tərəfdaşlıq SOCAR-ın qlobal LNG ticarəti bazarındakı mövqeyini genişləndirmək və beynəlxalq enerji bazarlarında fəaliyyətini artırmaq strategiyasının tərkib hissəsidir.