09:27 - 7.09.2026

---

7 Sentyabr, Fineko/abc.az. OPEC+ alyansının əsas aparıcı 7 ölkəsi (Səudiyyə Ərəbistanı, Rusiya, İraq, Küveyt, Qazaxıstan, Əlcəzair və Oman) keçirilən videokonfrans görüşündə oktyabr ayı üçün neft hasilatı kvotalarını sentyabr səviyyəsində sabit saxlamaq barədə qərar qəbul edib.

Alyans növbəti addımlardan əvvəl mövcud bazar şəraitini və kvota öhdəliklərinə riayət olunmasını qiymətləndirməyi planlaşdırır.

Görüş Hörmüz boğazında neft nəqlinin kəsintilərə məruz qaldığı mürəkkəb geostrateji şəraitdə baş tutub. Sentyabr ayında gündəlik 1,65 milyon barellik könüllü ixtisarların tədricən bərpa olunması prosesi tamamlanmışdı. Lakin neft hasilatı hədəfləri kağız üzərində artırılsa da, Yaxın Şərqdəki münaqişə və logistik maneələr səbəbindən bəzi OPEC+ üzvləri faktiki hasilatı müəyyən edilmiş kvotalardan aşağı səviyyədə saxlamağa məcbur olurlar.

Növbəti monitorinq görüşü 4 oktyabr tarixinə təyin edilib.