11:18 - 26.08.2026

---

26 avqust, Fineko/abc.az. İqtisadiyyat Nazirliyinin tabeliyində İqtisadi Zonaların İnkişafı Agentliyinin (İZİA) idarəçiliyində olan Sabirabad Sənaye Məhəlləsində bu ilin yanvar-iyun ayları ərzində 3,3 milyon manatlıq məhsul istehsal edilib.

İZİA-dan verilən məlumata görə, bu göstərici ötən ilin eyni dövrü ilə müqayisədə 3 dəfədən çox artım deməkdir.

Hesabat dövründə Sənaye Məhəlləsindən həyata keçirilən məhsul ixracında da nəzərəçarpacaq dinamika müşahid olunub — ixracın həcmi illik müqayisədə 74 faiz artıb.

Qeyd edək ki, Sabirabad Sənaye Məhəlləsi Azərbaycan Respublikası Prezidentinin 27 noyabr 2017-ci il tarixli Sərəncamı ilə yaradılıb. 20,3 hektar ərazini əhatə edən məhəllədə məişət məhsullarının istehsalı, kənd təsərrüfatı məhsullarının emalı, qida sənayesi və gübrə istehsalı prioritet istiqamətlərdir. Hazırda burada fəaliyyət göstərən 8 rezident tərəfindən ümumilikdə 11,8 milyon manat investisiya yatırılıb və 100-dən çox iş yeri yaradılıb.