15:34 - 30.06.2026

---

30 iyun, Fineko/abc.az. Milli Məclis “Azərbaycan Respublikasının 2025-ci il dövlət büdcəsinin icrası haqqında” qanun layihəsini üçüncü oxunuşda təsdiqləyib.

Bu barədə ABC.AZ xəbər verir ki, müvafiq qanun layihəsi parlamentin iyunun 30-da keçirilən iclasının gündəliyinə daxil edilərək müzakirəyə çıxarılıb və səsvermə ilə qəbul olunub.

Hesabata əsasən, 2025-ci ildə dövlət büdcəsinin icrası makroiqtisadi sabitlik fonunda baş tutub. Belə ki, hesabat ili ərzində ölkədə 1,4 faizlik iqtisadi artım və 5,6 faizlik orta illik inflyasiya qeydə alınıb. Eyni zamanda, cari hesablar üzrə tədiyyə balansında 3,5 milyard ABŞ dolları səviyyəsində müsbət saldo (artıqlıq) yaranıb, ölkənin strateji valyuta ehtiyatları isə yüksələrək 85,1 milyard ABŞ dollarına çatıb.

Sənəddə ötən il dövlət büdcəsinin gəlirlərinin proqnozlaşdırılan rəqəmləri üstələdiyi vurğulanıb:

Dövlət büdcəsinin gəlirləri: 39,2 milyard manat təşkil edib. Bu, nəzərdə tutulan proqnoza qarşı 829 milyon manat və ya 2,2 faiz çoxdur.

Dövlət büdcəsinin xərcləri: Proqnozun 93,2 faizi həcmində, yəni 38,6 milyard manat səviyyəsində icra olunub.

Müzakirələrin sonunda qanun layihəsi səsə qoyularaq sonuncu — üçüncü oxunuşda qəbul edilib.