16:39 - 30.05.2025

---

30 may, Fineko/abc.az. “Capital Partners İnvestisiya Şirkəti” QSC 2024-cü ili 39.3 min manat xalis mənfəətlə başa vurub. Bu göstərici əvvəlki ilin – 2023-cü ilin 94,5 min manatlıq mənfəətindən 58,4% və ya 55,2 min manat azdır.

ABC.AZ şirkətin illik audit hesabatına istinadən xəbər verir ki, 2024-cü ildə şirkətin əməliyyat gəlirləri 374,7 min manata yüksəlib, bu da ötən illə müqayisədə 130,9 min manat və ya 53,7% artım deməkdir.

İnvestisiya fəaliyyətindən əldə olunan gəlir də 2023-cü ildəki 7,8 min manatdan 21,8 min manata çataraq 179% artıb.

Lakin xərclərdəki kəskin artım mənfəətə mənfi təsir göstərib. İnzibati və sair əməliyyat xərcləri 2023-cü ildəki 154,9 min manatdan 333,5 min manata yüksələrək 2,15 dəfə artıb. Ən kəskin artım əməkhaqqı xərclərində qeydə alınıb – 2023-cü ildə 139,2 min manat olan bu göstərici 2024-cü ildə 262,4 min manata çatıb.

Şirkətin öhdəlikləri 2023-cü ildə 40,6 min manat olduğu halda, 2024-cü ildə bu rəqəm 124,6 min manata çatıb. Bu, 3 dəfədən çox artım deməkdir. Artım əsasən müqavilə öhdəliklərində və ticarət kreditor borclarında qeydə alınıb.