10:25 - 9.09.2026

---

9 Sentyabr, Fineko/abc.az. Nazirlər Kabinetinin 8 sentyabr 2026-cı il tarixli 274 nömrəli Qərarı ilə “İçərişəhər” Dövlət Tarix-Memarlıq Qoruğu İdarəsinin strukturu optimallaşdırılıb. İslahatın əsas məqsədi daha yığcam və çevik idarəetmə modelinin formalaşdırılması, təkrarlanan funksiyaların ləğvi və qərarvermə prosesinin sürətləndirilməsidir. Yeni struktur çərçivəsində İdarənin ştat vahidlərinin sayı 430-dan 300-ə endirilib.

Yenidənqurma çərçivəsində əvvəlki 8 tabeli qurumun əvəzinə iki yeni vahid — Muzey və Turizm Mərkəzi ilə Ənənəvi İncəsənət Mərkəzi yaradılıb.

Eyni zamanda, İdarənin Aparatında "şöbə və sektor" modelindən "departament və şöbə" sisteminə keçid reallaşdırılıb. Qurumdan bildirilib ki, optimallaşdırma prosesi zamanı əmək qanunvericiliyinin tələbləri və işçilərin hüquqları tam qorunacaq.