15:08 - 26.12.2024

---

26 dekabr, Fineko/abc.az. "Alibaba Group Holding Ltd." (BABA) və E-Mart Inc. Cənubi Koreyanın sürətli onlayn pərakəndə sektorunda rəqabət gücünü artırmaq məqsədilə əməliyyatlarını birləşdirmək qərarına gəliblər.

ABC.AZ xəbər verir ki, şirkətlər AliExpress International və Gmarket arasında 50-50 ortaq müəssisə yaradacaqlarını elan ediblər.

E-Mart-ın verdiyi açıqlamaya əsasən, yeni qurum tamamilə Gmarket-in sahibi olacaq və təxminən 4 milyard dollar dəyərində qiymətləndirilə bilər.

Müqavilənin ardından E-Mart-ın Seulda ticarət olunan səhmləri 5.5% artaraq şirkətin bazar dəyərini 1.4 milyard dollara çatdırıb.

Alibaba-nın Hong Kongda ticarət olunan səhmləri isə cari ildə 11% artaraq şirkətin ümumi dəyərini 200 milyard dollardan yuxarıya qaldırıb.