11:51 - 22.07.2024

---

22 iyul, Fineko/abc.az. Respublikaçıların prezidentliyə namizədi Donald Tramp seçkidə qalib gələrsə, Amerika avtomobil sənayesini tamamilə məhv olmaqdan xilas edəcəyini açıqlayıb.

ABC.AZ xəbər verir ki, mümkün tədbirlərdən biri kimi o, Çin avtomobillərinə 100-200% rüsumun tətbiqini göstərib.

Miluokidə Respublikaçıların Milli Qurultayında çıxış edən Donald Tramp ABŞ prezidenti Co Bayden administrasiyasının qəbul etdiyi elektriklə işləyən avtomobillərə kütləvi keçid strategiyasını tənqid edib. O, 2032-ci ilə qədər ABŞ-də satılan yeni avtomobillərin əksəriyyətinin elektrik mühərriki ilə təchiz edilməsi tələbini aradan qaldırmaq niyyətində olduğunu bildirib.

“Hazırda Meksikada böyük zavodlar tikilir. Çin onları maşın istehsal etmək və ABŞ-yə satmaq üçün tikir. Onlar dünyanın ən böyük  zavodlarını tikirlər. Bu zavodlar ABŞ-də tikiləcək və orada bizim insanlar işləyəcək. Əgər razılaşmasalar, o zaman biz hər avtomobilə təxminən 100-200% tarif tətbiq edəcəyik və onların ABŞ-də satışı qeyri-mümkün olacaq”, – Tramp söyləyib.