11:46 - 25.01.2019

---

25 yanvar, Fineko/abc.az. İyunun birinci yarısında Düşənbə şəhərində Asiyada Qarşılıqlı Fəaliyyət və Etimad Tədbirləri üzrə Müşavirənin (CICA) dövlət başçılarının beşinci sammiti keçiriləcək.

Rusiya mətbuatının verdiyi məlumata görə, bu barədə Düşənbə bələdiyyə başçısının administrasiyasındakı mənbə məlumat verib.

Sammitdə iştirak etmək üçün Tacikistana  Azərbaycan, Əfqanıstan, Bəhreyn, Vyetnam, Misir, Hindistan, İraq, İran, İsrail, Qazaxıstan, Kamboca, Çin, Qırğızıstan, Monqolustan, Pakistan, Fələstin, Rusiya, Tayland, Türkiyə və Özbəkistan liderləri gələcəklər.

CICA 1992-ci ildə Qazaxıstanın təşəbbüsü ilə yaradılmış dövlətlərarası forumdur. Onun fəaliyyəti Asiya regionunda dialoq, qərar qəbuletmə və təhlükəsizlik sahəsində tədbirlərin həyata keçirilməsi üçün şərait yaratmaqdır. Hazırda  Asiyanın 27 dövləti CICA-nın üzvüdür. Səkkiz ölkə və beş beynəlxalq təşkilat, müşahidəçi olaraq Forumda iştirak edir. 2014-cü ildən etibarən, CICA-nın mərkəzi qərargahı Astanada yerləşir.