17:35 - 17.06.2026
17 iyun, Fineko/abc.az. Dünya Bankı Türkiyənin bərpa olunan enerji bazarını genişləndirmək, külək enerjisi və batareya saxlama sistemləri (BESS) layihələrini dəstəkləmək üçün 400 milyon avro ($468,4 mln) məbləğində əlavə maliyyələşməni təsdiqləyib.
ABC.AZ xəbər verir ki, vəsait Türkiyənin zəmanəti ilə Türkiyə İnkişaf və İnvestisiya Bankı (TKYB) və Türkiyə Sənaye İnkişaf Bankına (TSKB) hər biri 200 milyon avro olmaqla iki Beynəlxalq Yenidənqurma və İnkişaf Bankı (IBRD) krediti şəklində təqdim edilir.
Nəticəyönümlü maliyyələşmə modelinə əsaslanan proqram çərçivəsində ödənişlər hədəflərə çatdıqca mərhələli şəkildə həyata keçiriləcək. Layihə sayəsində bərpa olunan enerji gücünün 1579 MVt, batareya saxlama gücünün isə 392 MVt/saat artırılması, həmçinin özəl sektordan 405 milyon dollara qədər investisiyanın cəlb edilməsi hədəflənir. Layihə, həmçinin Aİ-nin 2026-cı ildə qüvvəyə minən Sərhəddə Karbon Tənzimləmə Mexanizminin (CBAM) tələblərinə cavab vermək baxımından Türk sənayesinin rəqabət qabiliyyətini gücləndirəcək.
