11:39 - 25.05.2026
25 may, Fineko/abc.az. Almaniyanın tanınmış batareya istehsalçısı "Varta" şirkəti Bavariyanın Nördlingen şəhərindəki zavodunu bağlamaq məcburiyyətində qalıb.
ABC.AZ xəbər verir ki, zavodun bağlanması və şirkətin qonşu Ellvangen şəhərində yerləşən baş ofisindəki ixtisarlar nəticəsində ümumilikdə 350 iş yeri ixtisara düşəcək. Qərarın qəbul edilməsinə əsas səbəb kimi vacib bir müştərinin itirilməsi göstərilir.
Uzun müddət Almaniyanın "gizli çempionu" (hidden champion) və texnologiya lideri hesab olunan "Varta", hazırda zəifləyən iqtisadiyyatdan, eləcə də avtomobil və elektronika sənayesindəki qlobal tənəzzüldən ciddi şəkildə əziyyət çəkir. Şirkət son illərdə yüksək enerji qiymətləri, artan xammal xərcləri və Asiyadan gələn güclü rəqabətlə mübarizə aparırdı. İndi isə bura xarici ölkələrdən daha ucuz alternativlər taparaq şirkətdən imtina edən iri müştərinin itirilməsi də əlavə olunub.
Ekspertlərin fikrincə, bu hadisə bir çox Alman sənaye şirkətlərinin hazırkı vəziyyəti üçün xarakterikdir: vaxtilə dünya lideri olan nəhənglər yüksək biznes xərcləri, ideoloji siyasət və qlobal rəqabət səbəbindən sistemli şəkildə zəifləyirlər.
