14:06 - 23.07.2024

---

23 iyul, Fineko/abc.az. Azərbaycan, Türkmənistan, Gürcüstan və Rumıniya "Xəzər dənizi — Qara dəniz" beynəlxalq nəqliyyat marşrutunun yaradılması üçün birləşirlər.

ABC.AZ xəbər verir ki, bu layihənin həyata keçirilməsinin Mərkəzi Asiya ilə Avropa arasında beynəlxalq yük daşımalarının və logistikanın inkişafına əhəmiyyətli töhfə verəcəyi gözlənilir.

Rumıniyanın Konstansa limanı Xəzərin Türkmənbaşı limanından, eləcə də Qazaxıstan və Özbəkistandan Avropa İttifaqı istiqamətində yüklərin daşınması zəncirində əsas əlaqə ola bilər.

Marşrut xüsusi konteynerlərin istifadəsini nəzərdə tutur və Xəzər dənizindən Bakıya, daha sonra dəmir yolu ilə Batumi və ya Potiyə (Gürcüstan), daha sonra dəniz yolu ilə Rumıniyaya keçir.

Birləşmiş Ştatlar Mərkəzi Asiyadan mal ixracının Rusiya və Çin vasitəsilə deyil, alternativ marşrutlarla, o cümlədən Azərbaycan vasitəsilə həyata keçirilməsində maraqlıdır. Bu barədə iyunun 26-da ABŞ dövlət katibinin Avropa və Avrasiya məsələləri üzrə müavini Ceyms o'Brayen Konqresin Nümayəndələr Palatasının Xarici İşlər Komitəsində keçirilən dinləmələrdə bildirib.

Ukrayna ətrafında davam edən geosiyasi böhran və Qərbin Rusiyaya qarşı sərt sanksiyaları fonunda 2022-ci ildən sonra Avropa ölkələri üçün Rusiyanın "bypass" nəqliyyat marşrutlarına tələbat xeyli artıb.