16:16 - 23.01.2024

---

23 yanvar, Fineko/abc.az. 2023-cü ildə qazaxıstanlılar ikinci dərəcəli banklardan və ayrı-ayrı bank olmayan valyutadəyişmə məntəqələrindən ümumi çəkisi 1.6 ton olan 38 729 ədəd qızıl külçə alıblar.

ABC.AZ xəbər verir ki, bu barədə Kapital.kz saytının hazırladığı məqalədə qeyd edilib. 

Məqalədə vurğulanıb ki, əhali üçün ölçülən qızıl külçələrin satışı və geri alınması proqramı 2017-ci ildə başlayıb. Yarandığı gündən indiyədək ölkədə ümumi çəkisi 5.4 ton olan 151 574 ədəd qızıl külçə satılıb.

Qızıl külçələr beş çeşiddə mövcuddur: 5, 10, 20, 50 və 100 qram. 2023-cü ildə alıcılar arasında ən populyar ölçü 100 qram olub. 2023-cü ildə onun ümumi satışdakı payı 28% və ya 10.910 ədəd təşkil edib. Bundan sonra 5 qram – 9.795 ədəd (25%) və 10 qram – 9.409 ədəd (24%) gəlir, 50 qram – 4.818 ədəd (13%) və 20 qram – 3.797 ədəd (10%) sonuncu sıraları tutur. Ölçülü külçələrə ən çox Almatı, Astana və Çimkənddə tələbat var.